Við Guðný systir ásamt mökum drifum okkur norður á milli lægða fimmtud. 26. janúar. Fengum ágætis veður og færð alla leið. Á föstudeginum hlánaði hins vegar og var því mikil hálka þegar við fórum upp á Sauðárkrók til að heimsækja mömmu og Kristínu systur og fjsk. Mamma var svo ánægð og hress. Ljómaði við það eitt að sjá okkur (ekki að undra það) Spurði svo Árna og Gústa hvort þeir væru skyldir.. Sú gamla hefur þá alla vega ekki gleymt ættfræðinni og það er nú gott.

Við systurnar þrjár, Þórunn, Guðný og Kristín fórum svo á þorrablót á laugardagskvöldinu sem var rosalega skemmtilegt. Frábær nefnd sem sá um skemmtiatriðin. Magavöðvarnir tóku vel við sér í hlátri það kvöldið svo ekki sé meira sagt og svo var dansað til kl 3.

Það er alltaf jafn gott að koma norður og nýttum við ferðina vel. Eitt herbergi var málað bæði veggir og loft og allt inni í því var þrifið og pússað. Annað herbergi varð líka fyrir barðinu á kraftmiklum kellum með tuskuna að vopni!. Við náðum að fara í sund og kíkja í kaffi til Gunnu. Fara og versla í Kaupfélaginu þar sem við hittum fólk af svæðinu. Spiluðum svo kana eitt kvöldið þar sem Gústi sá um að færa systrunum írskt kaffi..... Það var spilað þangað til önnur systirin var farin að svíkja lit, þá sagði Gústi STOPP.

Þetta var frábær og skemmtileg helgi eins og alltaf þegar við komum norður.
Kveðja

Þórunn og Gústi